Rundunar 'Yan Sandan Jihar Abia ta sanar da kama mutane 13 da ake zargi da aikata laifuffuka daban-daban a wasu samame da ta gudanar a sassa daban-daban na jihar, a wani yunƙuri na daƙile fashi da makami, ayyukan ƙungiyoyin asiri da kuma lalata kadarorin gwamnati.

Mai magana da yawun rundunar, DSP Maureen Chinaka, ta bayyana cewa an gudanar da samamen ne bisa sahihan bayanan sirri da jami'an tsaro suka samu.

Daga cikin waɗanda aka kama akwai wani mutum mai shekaru 27 da ake zargi da safarar wani babban bututun ruwa na gwamnati da aka lalata, wanda aka ɓoye a cikin wata motar haya a yankin Ubakala da ke Umuahia.

Haka kuma, rundunar ta kama wasu da ake zargi da hannu a ayyukan fashi da makami a birnin Aba, inda jami'ai suka ƙwato bindigogi, harsasai da wasu kayayyakin da ake zargin na ƙungiyoyin asiri ne.

Rundunar ta ce ana ci gaba da gudanar da bincike kan lamarin, kuma za a gurfanar da duk waɗanda ake zargi a gaban kotu bayan kammala binciken.

'Yan sandan sun kuma yi kira ga mazauna Jihar Abia da su ci gaba da bai wa hukumomin tsaro sahihan bayanai domin ƙara inganta yaƙi da aikata laifuffuka da tabbatar da tsaro a faɗin jihar.