Shugaban Amurka, Donald Trump, ya ce zai zama “babban kuskure” idan aka cire Shugaban FIFA, Gianni Infantino, daga mukaminsa, duk da matsin lambar da yake fuskanta.

Goyon bayan da Trump ya nuna wa Infantino ya zo ne bayan da wasu ƙungiyoyin ƙwallon ƙafa suka fitar da wata buɗaddiyar wasiƙa, inda suka zargi shugaban FIFA da yaudarar su dangane da shirin FIFA Forward Enterprise (FFE) da aka dakatar.

Shirin FFE ya ƙunshi kafa wani sabon kamfani da zai kula da haƙƙin kasuwanci da sayar da tikitin gasannin FIFA, ciki har da Kofin Duniya. Tsarin ya kuma tanadi sayar da kashi 21 cikin 100 na hannun jarin kamfanin ga wani kamfanin saka hannun jari mai zaman kansa.

Kalaman Trump sun kasance karon farko da ya fito fili ya kare Infantino tun bayan da aka bayyana shirin FFE a ranar 28 ga Yuli.

A wani saƙo da ya wallafa a shafukansa na sada zumunta, Trump ya ce FIFA za ta yi babban kuskure idan ta yi tunanin maye gurbin Infantino saboda ko wane irin dalili.

Ya bayyana Infantino a matsayin mutum mai ban mamaki, yana mai cewa shi ne ya jagoranci gasar Kofin Duniya mafi nasara a tarihi.

Trump ya kuma yi hasashen cewa idan Infantino ya bar shugabancin FIFA, ba za a sake samun irin wannan nasara ko riba ba.

An gudanar da Kofin Duniya na 2026 tare a Amurka, Canada da Mexico a wannan bazarar, inda Spain ta zama zakara bayan ta doke Argentina a wasan ƙarshe.

Sai dai lokacin da aka fara tambayar Trump game da shirin FFE a ranar 31 ga Yuli, ya ce bai tattauna da Infantino kan batun ba.