Hukumar ƙwallon ƙafa ta duniya, FIFA, ta musanta wani rahoto da ke zargin cewa UEFA ta biya wata mata da aka bayyana a matsayin masoyiyar shugabanta, Gianni Infantino, a lokacin da yake jagorantar hukumar ƙwallon ƙafa ta Turai.

Wani mai magana da yawun FIFA ya bayyana zargin da jaridar Daily Telegraph ta Birtaniya ta wallafa a matsayin wanda ba shi da wata gaskiya ko kaɗan, yana mai cewa Infantino ya yi kakkausar suka ga rahoton.

Sai dai UEFA ta tabbatar da cewa ta biya matar da ake magana a kanta wani kuɗin sallama bayan ta bar aikinta, sannan ta ɗauki nauyin karatun MBA ɗinta.

UEFA ta ce dukkan waɗannan kuɗaɗe an biya su ne bisa ƙa'idoji da tsarin aiki da suke nan a lokacin, tana mai musanta cewa an yi wani abu da ya saɓa wa dokokinta.

Zargin ya fito ne a daidai lokacin da ake fama da tsamin dangantaka tsakanin FIFA da UEFA, musamman kan wasu tsare-tsaren da Infantino ya gabatar a baya, ciki har da shirin sayar da wasu haƙƙoƙi ko hannun jari da suka shafi gasar cin kofin duniya da sauran manyan gasa.

Rahoton ya ƙara jawo cece-ku-ce kan yadda ake gudanar da harkokin kuɗi da alaƙar shugabannin manyan hukumomin ƙwallon ƙafa, duk da cewa FIFA da UEFA sun musanta cewa an aikata wani abu ba bisa ƙa'ida ba.